KIRMANCKÎ

Newala Godernê û 50 dewî…

Dem : 09 Tîrmeh 2018 Duşem

Dewleta tirkî bi rayirê baraj û Santralê Hîdroelektrîkî (HES) cografyaya Kurdistanî texrîb kena. Her çend ke reaksîyonî bibî zî hukmatê AKPyî wazeno tarîx, kultur û tebîetê Kurdistanî çin bikero. Nê îcraatanê AKPyî ra yew zî Barajê Farqînî yo. Viraştişê barajî çarçeweya GAPî de serra 2009î de dest pêkerd û se ra 80 qedîyayao. Baraj Santralê Hîdroelektrîkî û 23 tesîsan rap ê yeno û do mîyanê 2 serran de biqedîyo.

Barajê Farqînî ke 175,5 metre berzî yo, badê barajê Ataturkî do bibo yê tewr berzî. Vîşêrê no barajî do 16 barajê sewbîna zî bêrî viraştiş. Her çend ke reaksîyonî bibî zî viraştişê Barajê Ilisu yê Heskîfî dewam keno û se ra 95 qedîyayo. Babete ser o Endamê Platformê Pawitişê Hewselî Guner Yanliçî qisey kerd.

Herêmanê kurdan rijnenî

Yanliçî qiseykerdişê xo de wina va: “Dewleta tirkî 1940î de bin nameyê polîtîkayê pawitişê herêmanê kurdan de dest bi viraştişê barajan kerde. Çarçeweya projeyê GAPî de heta nika viraştişê 11 barajan ameyo plankerdiş. Dewlete seba vengkerdişê herêmanê kurdan, birnayîşê têkilîya komel û şerî dest bi viraştişê barajan kerde. Kamî ca de kurdê ke vera îqtîdarî de çong nêronayo bibî de barajî yenî viraştiş.”

Çinkerdişê mezgê merdiman

Yanliçî qiseykerdişê xo yê peyênan de zî wina va: “Barajo ke Farqînî de yeno viraştiş, baajê tewr pîlî yê Tirkîya yo û keweno mabenê Newala Godernê, Farqîn, Lice, Pasûr û Hezroyî. 50 dewî do binê barajî de bimanî. Merdimê ke dorme de cuyenî do mecburî koç bikerî. Şarê dorme yeno mexdurkerdiş. Viraştişê barajan netîceyê polîtîkayê hezar serran o û çinkerdişê mezgê merdiman o. Newala Godernê, Newala Sonide, Çemê Holada û Heskîfî do binê awe de bimanî.” AMED

Albuma Nûçeyê