KIRMANCKÎ

Milyonek kesî do sindoqan bipawî

Dem : 20 Pûşper 2018 Çarşem

CHP, HDP, Partîya ÎYÎ, SP û DÎSK û KESKî tede xeylê sendîka û rêxistinê demokratîke ameyî têhet û Platformê Weçînayîşî yê Adil awan kerdî. Endamê platformî Tayfun Îşbîlenî ard ziwan ke do roja weçînayîşî tewrê milyonek kesî taxan de bibî û sindoqan bipawî. Îşbîlenî seba pawitişê sindoqan veng da hemwelatîyan ke muracatê platformê înan bikerî û roja weçînayîşî de wezîfe bigîrî.

Îşbîleni qiseykerdişê xo de wina va: “Çarêweya xebatan de ma heta nika tewr kêmî 500 hezar kesan seba sindoqan wezîfedar kerdî. Xebata ma ya muşahîdî hema dewam kena. Seba her sindoqêk wezîfedarê ma esto. Ma do roja weçînayîşî de 500 hezar muşahîdan zî wezîfedar bikerî. Ma zaf nizdîyê hedefê xo bîyî. Hema zî hemwelatîyî muracatê ma kenî ke weçînayîşî de wezîfe bigîrî. Çarçeweya xebatan de ma veng danê heme hemwelatîyan ke rayanê xo bixebitnî û seba pawitişê sindoqan bibî muşahid.”

Îşbîlenî qiseykerdişê xo yê peyênan de zî wina va: “Şewa weçînayîşî de seba ke vernîya manîpulasyonan bêro girewtiş, ma do kuçe bi kuçe netîceyê weçînayîşî biresnî rayapêroyî. Eke mudaxilê sindoqan bêromkediş, 50 hezar avûkatê ma do bikewî dewre. Seba pawitişê sindoqan 50 hezar avûkatê ma zî mîyanê wezîfedaran de yî. Ma AKP û MHPyî zî dawetê platformî kerd. Labelê ê nêwaştî daxil bibî. Ma tena rayanê muxalefetî nêpawenî. Ma do wayirê heme rayan bivejîyî.” ANQARA

Albuma Nûçeyê