KIRMANCKÎ

Ma lomey xo xo ra bikerê - Nûşteyê Nesrîn Navdar

Dem : 14 Îlon 2018 În

Nesrîn Navdar

Rahîm Hisên Penahî, Zanyar û Luqman Mûradî; nameyê hîrê ewladanê dayê û bayêyan, hîrê cegerê wayê û birayan, hîrê şêrê Kurdan û hîrê vengahîyê zerrye heskerdan ke hetê rejîmê Îranî yê zalim û qetilkaran ra şodirê heştê Êlule de ameyî dardekerdişî. Ma zanê ke Penahî, Zanyar û Luqman ê verînî nêbî ke hetê rejîmê hovî ra ameyî îdamkerdişî û eke ma wina bê vengî bê go yê peyînî zî nêbê. Xo ra na se serra peyîne ra tepya pîlan ra heta qican, nezanan ra heta zanayan heme Kurdî bi zilm, hovîtî, heqaret û neheqîyanê rejîmanê despot û dagirkeran ke her çar perçeyan de şarê Kurdî ser de pêk ardo û neyartîya înan a tarîxî û ebedî ya Kurdan rê baş zanê.

Heta tenê nêzanê bîyê şahid û mexdûrê înan bi xo. Etya çiyo ke nêkono heşê merdimî qebûlkerdişê Kurdan ê nê zilm û heqaretê dagirkeran o ke înan ser de pêk anê. Eyro nê rejmê zalim û dagirkerî heme cesaretê nê kerdişanê xo yê teberê merdimahî de bêvengî û qebûlkerdişê Kurdan ra gênê. Eke ma roco verîn ra yewîtîya xo biviraştêne, êşê her şexsêke şarê xo sey êşê xo bivînayne, wayîr ro warê xo, xozaya xo û welatê xo bivecyayne eyro roc neyartî û dişminîya nê zaliman ke nê serranê peyînan de bi taybetî hetê desthilatanê rejîmê Îranî û yê Tirkîye de hemverê şarê Kurdî vecyaya dereceyêke tewr berzî xo rê bi nê awayî ca û derfet nêdîne ke nê mexsedanê xo yê teberê merdimahî de pêk bîyarê. Xo ra dagirkerî bi zilm û zordarîya xo cayan dagir kenê.

Yanê xozaya dagirkeran de zilm û zordarî esta. Heta ke ma nişnenê ro û wirzenê we lomeyê xo dagirkeran ra kenê lazim o ma lomeyê xo jobînan ra bikerê û hesab jobînan ra biwazê ke çi rê ma destûr dayo ke nê dagirkerî bikoyê welatê ma, yan çi rê ma hema zî destûr danê ke welatê ma de bi ca bibê. Heta ke ma bi nê awayî bêxîretî bikerê ey go zî bi nê awayî zilmê xo bidomnê, ne xozaya ma verdê û ne zî ciwîyayîşê ma yê bi azadî verdê. Heta ke ma wina bêvengî bê go kindir di qirike ciwananê ma de, hesrî di çimanê dayanê ma de, verê ma koçberîyan de û dûyê agirê dagirkeran dar û beran, dewan û şaristananê ma ser de bidomyo.

Heta her dayêke Kurde birîna dayanê Penahî, Luqman û Zanyarî sey birîna xo nêvîno, heta ke her ciwanêke Kurd kindirê qirike înan qirike xo de hîs nêkero, heta her şexsêke Kurdan êşê malbatanê înan sey êşê xo nêvîno û hemverê nê awayî kerdişanê neînsanî, dijminî û hovîtî yê dagirkeran têkoşîne xo berz nêkero go kerdişê dagirkeran ê bi nê awayî û mendişê înan ê axa ma ya pîroze ser de bidomyo. Ancî çi heyf ke hemverê heme kerdişanê dagirkeran zî Kurdî bê veng manenê û hewl nêdanê ke yewîtîyêke neteweyî mîyanberê xo de awan bikerê.

Heta ke ma dimayê her hovîtî û zilmê dagirkeran cayê xo de nişnenê ro û tenê lomeyê xo kenê ke çi rê wina kenê lazim o ma lomeyê xo xo ra bikerê ke ma çi rê hemverê kerdişanê nê dagirkeran endeyke bêveng manenê û hewl nêdanê hemverê nê zilm û hovîtîya înan têkoşînêke pêdir bidê û bi yewîtî xo binê zilmê înan ra bifeletyê. Erê eke ma wazenê zilm û hovîtîya înan axa ma ser de wedaryo lazim o ma hesab hemkaranê dagirkeran û xayînan ra ke mîyanê ma de ca gênê biwazê û yewîtîya xo xurt bikerê. Ancax a gamî ma eşkenê binê zilm û hovîtîya dagirkeran ra xo feletnê.

Albuma Nûçeyê