KIRMANCKÎ

Ma do bibî vengê welat

Dem : 12 Pûşper 2018 Sêşem

Namzedê Partîya Demokratîke ya Şaran (HDP) yê Stenbolî Mehmet Gulerî pîyê şervanê Hêzê Azadîya Yewbîyaye (BOG) Azîz Gulerî ke Rojawanî de şerê vera DAIŞî de cuya xo vînî kerdbî û cenazeya ci 59 rojan sînorî de amebî vindetişî yo. Pîyê Azîz Gulerî, Mehmet Gulerî ke bîyo namzed dîyar kerd ke seba vîrardişê lajê xo bîyo namzed.

Gulerî qiseykerdişê xo de wina va: “Şehadetê lajê mi tesîrêk zêde mi ser de viraşt. Embazê Azîzî waştî ke ez biba namzed. Labelê reyna zî ez nêfikirîyaya. Wexto ke vatî seba vîrardişê Azîzî ma têkoş danî, ez îqna bîya. têkoşînê ma HDPyî de dewam keno. HDP heme sozê ke dayo, ardo ca. HDPyî de heqê cinî, doman, wendekar, merdim, teqawit, tebîet û heywanan esto. Cok ra ez HDPyî de bîya namzed. HDP partîya laz, çerkez, elewî, ermenî û heme cîyayêyan a. Êdî partîya Tirkîya ya. Ez eslê xo ra elewî ya û zaf kêfweşa ke HDPyî de ca gêna”

Gulerî qiseykerdişê xo yê peyênan de zî wina va: “Ma do meclisî de bibî vengê bindest, kedkar û heme karkeran. Ma do meclisî de bibî vengê şar û şorişgê ke Rojawanî de şehîd bîyî. Rojawan welatê ma yê diyîn o.”STENBOL

Albuma Nûçeyê