KIRMANCKÎ

Kuçe bi kuçe xebata weçînayîşî

Dem : 14 Pûşper 2018 Pêncşem

Namzeda HDPyî ya Herêam Yewin ya Stenbolî Şehrîban Alkişe ke pereyê simîtî kêmî kerde û market ra ‘wesayîtê weçînayîşî' kîra kerde, balonê rengînan bi wesayîtê xo daliqna û kuçeyê Kadikoyî de vilawikan vila kena. Namzeda Partîya Demokratîke ya Şaran (HDP) Şehrîban Alkişe qiseykerdişê xo de dîyar kerde ke sîstemê vengî, wesayîtê luks, îmkanê zêde û wextê înan çin î, labelê reyna zî ê xurtê û çi destê înan ra bêro do bikerê.

Alkişa ke 23 serrî ya û wendekara Beşa Komelî ya Unîversîteya Marmara de wanena qiseykerdişê xo de wina va: “Ma her çar hetê Stenbolî de xebatan meşnenî û seba rayanê HDPyî xebatan kenî. Wesayîtê ma yê weçînayîşî yê luksî çin o. Mi seba vengdayîşê rayan erebokê marketî kîra kerde û bi balonan xemilna. Sepetê mi de afîş û vilawekî estî û ez înan vila kena.”

Alkişe qala xebata weçînayîşî kerde û wina va: “Mi waşt ma hem rengê HDPyî û hem zî rengê ciwanan bidê mojnarayîş. Ma balonan dayî ro, afîşê Selahattîn Demîrtaşî, flamayê HDPyî ma dayî ro. Xeylê bale ant. Yê derûdorî sempatîyêke pîl mojnayî ra.” Alkişe daye zanayîş ke xeylê endam, xebatkar, îdarekar û namzedê serekomarî yê HDPyî ameyi tewqîfkerdiş û va verê ey de HDPyî problemê ekonomî zî cuyenê û va pêwa her çî, do destê înan bêro bikerê û vengê xo bidê eşnawitiş.

Alkişe qiseykerdişê xo yê peyênan de zî wina va: “Ma bi piştdayîş pere kom kerd û megafon girewt. Zêde baş nîyo û veng baş nêvejîno. Ma market ra erebok bi pere kira kerd. Dima ra ma dest bi xebate kerde. Xebatê cîya û rengîn şarî kêfweş keno. Her kes eleqeyêke pîl mojneno ra. Ma do bi wesayîtê xo yê marketî barajan birijnê.” STENBOL

Albuma Nûçeyê