KIRMANCKÎ

Krîzê ekonomî da sektorê dermanan ro zî

Dem : 11 Tebax 2018 Şemî

Her ke şono krîzê ekonomî hîna zêde beno û tesîrê xo dano heme sektoran ser. Seba ke zemînê fîrmayê dermanan yê teknîkî çin o nêeşkenî dermanê rîşa merdimwere ber ardene bikerî. Tewr peynî seba dermanê ke yenî îthalkerdiş 14ê sibata 2018î de mabenê Wezîrîyê Weşî û fîrmayê dermanan de pêkerdişêk amebî viraştiş. Wextê pêkerdişî de derheqê vayeya dermanan de Euro ser de pêkerdî û aye wext Euro 2.69 TL bî. La demê peyênan de Euro resa 7 TLyî û na rewşe bîye sebebê krîzê sektoran.

Babete ser o Hemserekê Sendîkaya Kedkaranê Xizmetê Sosyal û Weşîye (SES) yê Herêma Stenbolî Erdal Guzelî qisey kerd û dîyar kerd ke krîzo ke sektorê dermanan de yeno cuyayîş do hîna xirab bibo û ganî îqtîdar fek nizdîbîyayîşê xo yê bagirganî ra vera bido.

 Guzelî destpêkê qiseykerdişê xo de bale ant polîtîkayê weşî û zihnîyetê bazirganî ser û wina va: “Nê polîtîkayî wextêk dergo ke estî. Krîzê ekonomî reyde nêvejîya yî. Sendîkaya ma na rewşe hertim ardêne ziwane. Ma esas nînê girewtiş. Sîstemê randevu û sînorkerdişê heqê tedawî bî sebebê reaksîyonan. Her çend ke polîtîkayê weşî yê Tirkîya baş bêrî nîşandayîş zî esasê xo de wina nîyî. Nizdînîyayîşê serekê AKPyî gengeyê pereyan o.”

Guzelî tewr peynî va ‘nizdîyê 800 tewir dermanî hetê fîrmayê Tirkîya ra tepişteyî û nêerzîyenê pîyasa’ û wina qedêna: “Xeylê dermanî pîyasa ra ameyî antiş. Tirkîya de berardişê dermanan çin a û girêdayeyê teberê welatan a. No proses de kesê ke pereyê înan bibî, eşkenê dermanan temîn bikerî. Seba çareserkerdişê probleman, ganî nêweş û merdimê nêweşan reaksîyon binawnî polîtîkayan. Ganî tedbîrî bêrî girewtiş û laboratuvarê dermanan bêro viraştiş.” STENBOL

Albuma Nûçeyê