KIRMANCKÎ

Kovîtîya dewleta tirkî bêsînor a

Dem : 10 Tîrmeh 2018 Sêşem

Kovîtîya dewleta tirkî ya dagirker Efrînî de bêsînor a. Dewleta tirkî tewrê çeteyanê xo Efrînî de sûcê merdimîye kenî, la dewletê mîyanneteweyî bêveng manenî. X.H.yo ke destê çeteyan ra filitîyayo babete ser o va: “Ganî dewlet, rêxistin û komeleyê mîyanneteweyî vera nê kerdişan de bêveng nêmanî”

Dewleta tirkî ya dagirker û çeteyê aye Efrînî de talan, dizî, qetlîman, qetilkerdiş, destdergkerdiş û rijnayîşan virazenî û roj bi roje înan zafe kenî. Keyeyê ke zilmê dewlet û çeteyanê tirkî dîyî, mergî danî çimanê xo vera û hewl danî ke biremî. X.H.yî nêkesan ra yew o. X.H.yî wehşîya dewleta tirkî ya bajarê Efrînî ra 3 aşmî verê cu remayo û xo înan ra rizgar kerdo. X.H.yî qala hedîseyê ke 3 aşmî verm vu bîyo şahidê înan kerd.

X.H.yî qiseykerdişê xo de dîyar kerd ke merkez, qeza û dewanê Efrînî de heqê cuye destê merdiman ra ameyo girewtiş û wina va: “Ma şert û mercê zehmetinan de qebul kerd, la dagirkerîya dewleta tirkî û çeteyanê înan qebulnêkerd. Ez tewrê cinî û domanê xo 3 aşmî verê cu dewa Maratê ya Efrînî ra ameya tîya. Teyareyê şerî keyeyê mi rijnayî. Ma mecbur mendî de Efrînî ra biremî.”

Dest ronenê heme çîyan ser

X.H.yî dewamê qiseykerdişê xo de va ‘ewja de zilm esto, merdiman veşênenî, dest erzenî merdiman, îşkence bi merdiman kenî û pere wazenî’ û wina donma: “Mi tepiştî û 10 rojan zindan de vera dayî. Keyeyêk kerdbî zindan. Îşkence bi mi kerdî. Seba ke ez xo destê înan ra bixelisna, mi soz da înan ke pere bida înan. Şert eştî mi ver ke badê serbestveradayîşê xo 5 rojan de 5 hezar dolaran bida înan. La pere û karê mi qet çin bî. Rayîrî padaye bî. Qurişêk daxî yê merdiman bibayêne, seba qurişêk merdiman kiştêne.”

Herra ma dagirkerde ya

X.H.yî qiseykerdişê xo yê verênan de vend da dewlet, rêxistin û komeleyê merdimîye yê mîyanneteweyî û wina va: “Ez, dayik, pî, cinî û domanê xo Efrînî ra remayî. Pîyê mi 80 serrî û dayika mi zî 70 serrî ya. Domanê mi rayirê filitîyayîşî de vêşan û bê awe mendî. Ma heme çîyan girewt çiman ver û remayî. Ma wazenê êdî vengê ma bêro eşnawitiş. Ma dew, bajar û herra xo wazenî. La ma tersan vera nêewtanenê şêrî. Ganî dewlet, rêxistin û komeleyê merdimîye yê mîyanneteweyî bêveng nêmanî. Ma nika kampa Serdemî de manenî. Ma asayî de yî. La reyna zî ma asan nîyî, çimkî herra ma destê dagirkeran de ya.”

Îşkence, dizî, remnayîş…

X.H.yî bale ant rewş û muameleyê ke bi hemwelatîyan ameyî kerdiş ser û wina dewam kerd: “Her dewe ra bi desan cinîyî ameyî remnayîş û tepîya nêameyî. Goreyê çeteyan pêroyê kurdan Apocî yî. Merdiman erzenî mîyanê bîrê awan. Domanê ke hema nêameyî dinya yenî qetilkerdiş. Efrînî de îşkence, dizî, remnayîşê doman û cinîyan û sewbîna xeylê çîyî estî. Eleqeya daran kurdan yewbîna reyde çin a. La daran zî birnenî. Êdî dizî sey çîyêk normal yeno dîyiş.”

Keyeyan kerdî zindan

X.H.yî qiseykerdişê xo yê peyênan de zî wina va: “Keyeyê mi de çina estbî berdî. Ber, şibak, tablo û çina kewt destê înan berdî. Tena desî mendî û ê zî bi teyrayanê şer ameyî rijnayîş. Çeteyî wexto ke yenî dewe tewr kêmî 20 cinîyan xo reyde benî. Dîn, îman û sewbîna heme çîyê înan pere yo. Dewleta tirkî tewrê çeteyan dest ronenî pere, keye, can û sewbîna heme çîyê hemwelatîyan. Efrînî de sûcê merdimîye yeno kerdiş. Keyeyan kerdî zindan û hûmara hepsîyan zêde ya. Kesê ke pere nêdî yenî qetilkerdiş.” ŞEHBA

Albuma Nûçeyê