KIRMANCKÎ

Keyeyê înan estbî, la konan de cuyenî

Dem : 10 Tîrmeh 2018 Sêşem

Taxa Fîkîrtepe ya qezaya Kadikoyê ya Stenbolî de serra 2011î ra nata bedilnayîşê bajarvanî dewam keno û wayîrê keye û awanîyan ameyî mexdurkerdiş. Serra 2016î de taxa Dumlipinarî ya Fîkîrtepeyî de rijnayîş dest pêkerde. Xeylê hemwelatî mecbur mendî ke keyeyê xo biteriknî û şêrî kîrayan. Hemwelatîyî dîyar kerdî ke tarîxo ke înan ra ameyo vatiş de keyeyî teslîmê înan nêameyî kerdiş. Hemwelatîyê ke rewşa înan çin a şêrî kîrayan dormeyê rasteya înşaatî de konî akerdî û 28 rojîyo ke nobeta cigêrayîşê heqê xo tepişenî.

 ‘Projeyê Brooklyn Dreamî’ hetê wayîrê Pana Yapi yê Şîrketê Înşaatê Selîmogluyî ra yeno viraştiş. Hemwelatîyî reaksîyon nîşan danî na rewşe. Babete ser o hemwelatîyê bi nameyê Zeynep Duzgunogluye, Ferhat Ozdemîr, Medîne Şîmşek û Suat Erdoganî qisey kerdî.

Hemwelatîyî qiseykerdişê xo de qala sozê şîrketî kerdî û wina vatî: “No şîrket ame û ma pê kerdî. Ma ra va ke ‘Ma do keyeyê şima newe bikerî û dima ra teslîm bikerî.’ La sozê xo netepiştî. Ameyî kişta keyeyê mi û beton rijnayî. Dima ra zî remayî û nêviraştî. Pêroyê daîreyan rotî kesê ke tîya de nêronişenî. Pêroyê merdiman mexdur kerdî. Înşaat nîmcet mend û sewbîna fîrmayêk nêvirazeno. Wayîrê şîrketî Racî Şaşmaz o. Şaşmaz ma mexdur kerd. Pana Yapi hetê dewlete de yo. Racî Şaşmaz û Tayyîp Erdogan pîya fotografan ancenî. Ma wayîrê keyeyan bî. La nika ma konan de cuyenî.” STENBOL

Albuma Nûçeyê