KIRMANCKÎ

Kesêk nêeşkeno kurdan çin bihesibno

Dem : 11 Tîrmeh 2018 Çarşem

Hêriş û dagîrkerîya dewleta tirkî ya vera Başûrê Kurdistanî de dewam kenî. Dewleta tirkî demêko derg o hêrişê erdê Başûrê Kurdistanî kena û hewl dana Başûr bi temamî dagîr bikera. Na çarçewa de hêrişê herêmanê kurdan kena. Babete ser o Verfeka Hemserekatîya Bajarê Dêrikî Kerîme Fethoye qisey kerde û qala hêrişê dewleta tirkî yê herra Rojawanê Kurdistanî kerde.

Verfeka Hemserekatîya Bajarê Dêrikî Kerîme Fethoye qiseykerdişê xo de wina va: “Erdogan wazeno sîstemê neteweya demokratîke çin bikero, la îdareya şaran tehdit û hêrişanê Erdoganî ra hîna pîl o. Kesêk nêeşkeno îradeya şarê kurdî çin bihesibno. Netîceyê pêkerdişê mabenê Tirkîya û dewletê mîyanneteweyî de hêrişî virazîyayî. Hedefê dewleta tirkî qezencê kurdan û çinkerdişê înan o. La şarê kurd do bi hêz û îradeya xo nê hêriş û plananê lêşinan beng bivejno.”

Kerîme Fethoye dewamê qiseykerdişê xo de wina va: “Tirkîya çend serrî yo ke vera xeta azadî û demokrasîye de dest bi hêrişan kerda. Dewletê mîyanneteweyî zî menfîetanê xo yê şexsî vera vengê xo nêkenî. Hêrişê dagirkerî dewam kenî. No siyaseto lêşin tesîrê xo dano heme şaran ser. Tirkîya wazena ke sîstemê netewa demokratîke çin bikera.”

Kerîme Fethoye qiseykerdişê xo yê peyênan de wina va: “Tarîx ra nata polîtîkayê Tirkîya xo dibare kerdî. Tirkîya înkar û pelçiqnayîşê şarê kurdî ser awan bîya û ma benî şahidê polîtîkayanê Tirkîya. Nê polîtîkayî çar parçeyê Kurdistanî de yenî meşnayîş. Şarê kurd destûr nêdano xeyalê împaratorîyê osmanîyan awan bibo. Erdogan heme merdiman ser de tehdit awan keno. Ganî vernîya plananê Erdoganî bêro girewtiş. Bi piştîyê Rûsya Efrînî dagir kerdî. Bi xoverdayîşê şaran do nê planê lêşinî têk şêrî. Do bawerî û îradeya şaran qezenc bikero.” DÊRIK

Albuma Nûçeyê