KIRMANCKÎ

Kerdoxê qetlîyamî teber de yî

Dem : 12 Kewçer 2018 În

Şahidê Qetlîyamê 10ê Teşrîna Verêne dîyar kerdî ke heta kerdoxê esasî nêrî muhakemekerdiş do têkoşîn dewam bikero û vatî: “Zaf aşkerayo ke DAIŞ bi destê dewlete kewt raşteyê mîtîngî. Kerdoxê qetlîyaman teber de yî.”

Seke yeno zanayîş 10ê Teşrîna Verêna 2015î de Anqara de qetlîyamêk amebî viraştene û netîceyê qetlîyamî de 105 kesî merdbî û bi seyan kesî zî birîndar bîbî. Badê qetlîyamî destûr nêdîyabî ke ambulans û karkerê weşî şêrî cayê hedîse û polîsî bi gazê bombe hêrişê birîndaran kerdbî. Netîceyê hedîseyan de xeylê birîndarî bi vînîkerdişê gonîya zêde û gazî merdbî. Perê serrgêra 3. ya qeylîyamî bî.

Babete ser o Şahidê Qetlîyamê 10ê Teşrîna Verêne yê Anqara ra Kolektîfê Wendekaran ra Tuana Oguz, Odeya Muhendisê Makîneyan ra Gunîz Gacaner û Hemseroka Partîya Demokratîke ya Şaran (HDP) ya Karabaglar û endama Komeleya Piştîdayîş û Aştîye ya 10ê Teşrîna Verêne ra Hanîfe Budake qisey kerdî. Şahidê qetlîyamî seba ke qetlîyam nêro vîrîkerdiş û têkoşînê edaletî dewam bikero qala aye roje kerdî.

Tayîp leqayîşê îqtîdarî ra tersa

Oguze qiseykerdişê xo de daye zanayîş ke badê weçînayîşê 7ê Hezîrane hêriş pêser pêser ameyî û wina dewam kerde: “Tayîp hîskerd ke îqtîdarê ci leqeno. Cok ra dest bi hêrişan kerd. Ganî muxalefetê çep û şorişgerî nê planan hîs bikerdêne. Ganî aye roje tedbîrê hîna başî biameyêne girewtiş û heme kesî xo bipawitêne. Vîrardişê qetlîyamî de hûmara polîsan hîna zêde bî, la roja teqayîşî polîsêk daxî raşteyê mîtîngî de çin bî. Aşkerayo ke no teqayîş verê cû amebî kerdiş. DAIŞ bi destê dewlete kewt raşteyê mîtîngî.”

Dewlete aştîye ra tersa

Gacanere dîyar kerde ke vernîya ambulansan amebî girewtiş û destûr nêdayî ke bikewî raşteyê hedîse û va: “Badê teqayîşî polîsî ameyî û bombeyê gazî eştî kesê ke hetkarîya birîndaran kerdêne ser. Heme kesî de kêfweşîyêk estbî û azadîya merdimîye waştîne. Destê kesêk de çek çin bî. Mi gore dewlete aştîye ra zaf tersa.”

Dîlok, Anqara û Amed….

Tewr peynî Budake qisey kerde û wina va: “Mêrdeyê mi Mustafa Budak teqayîşî de bi giranê birîndar bî û badê aşman cuya xo vînî kerd. Aye roje xeylê birîndarî vînîkerdişê gonîya zêde vera merdî. Kesêk ke doza Dîlokî de ameyî tepiştiş bi mehneya ‘weşî’ serbest veradîya yî. Dîlok, Amed û Anqara de bi seyan kesî ameyî qetilkerdiş. Kerdox hema teber de yî. Ma do heta peynî doze taqîp bikerî.” ÎZMÎR

Albuma Nûçeyê