KIRMANCKÎ

Ganî mehkema qetlîyamî roşna bikera

Dem : 11 Kewçer 2018 Pêncşem

Vizêr serrgêra Qetlîyamê Anqara bî. Rojnameger Gokçer Tahîncîogluyo ke Qetlîyamê 10 Teşrîna Verêne de raşteyê mîtîngî de bî qala aye roje kerd û va: “Ez cuya xo de bîya şahidê xeylê çîyan, la mi çîyêk sey Anqara nêdî. Ganî mehkema komelî roşna bikera.”

Weçînayîşê 7ê Hezîrane ra dima konseptê îmhakerdişî erzîyabî dewre û Amed, Pirsûs û Anqara de têdima qetlîyamî ameybî viraştiş. Nînan ra yew zî Qetlîyamê Anqara ke 10ê Teşrîna Verêna 2015î de virazîyabî yo û netîceyê qetlîyamî de 105 kesî ameybî qetilkerdiş û bi seyan kesî zî birîndar bîbî.

Qetlîyamê Garê Anqara ra 3 serrî derbaz bî û vizêr serrgêra Qetlîyamê Anqara bî. Babete ser o Rojnameger Gokçer Tahîncîogluyo ke Qetlîyamê 10 Teşrîna Verêne de raşteyê mîtîngî de bî qisey kerd.

Tahîncîogluyî qiseykerdişê xo de va ‘pêroyê cuya mi de cayê 10ê Teşrîna Verêne zaf cîya ya’ û wina dewam kerd: “Ma seba aştîwaştişî raşteyê mîtîngî de bî. Çapemenî, rêxistinê komelê sivîl, sendîka û xeylê kesî seba demokratîkbîyayîşê Tirkîya ameybî Anqara. Wexto ke ma şîyêne hetê raşte teqayîş virazîya. Ez bi refleksê rojnamegerî vazdaya hetê raşte. Ez cuya karê xo de şahidê xeylê çîyan bîya, la mi çîyêk sey Anqara nêdî.”

Tahîncîogluyî dewamê qiseykerdişê xo de qala qewimîyayîşê teqayîşî kerd û va: “Xeylê kesê ke mi şinasnayêne erd ser de mîyanê gola gonî de mendbî. Heme kesî mat mendbî û nêzanayêne çi bikerî. Heme kesî sere de mudaxaleya kesê nizdîyê xo kerdêne. Kesê ke merdimê înan erd de bî înan kerdêne xo verik û bermayêne. Ewja de dinya û wext vindetbî. Embazê mi bermayêne. Merdim nêeşkeno qala aye roje bikero. Ma hem karê xo kerdêne û hem zî hetkarîya birîndaran kerdêne. Ma bîyî şahidê aye roja ke cuya merdimî de qet vîrê merdimî ra nêşêra. Şok û trawmaya aye roje qderbaz nêbenî.”

Tahîncîogluyî tewr peynî dîyar kerd ke Tirkîya de pêser pêser qetlîyamî virazîyayî û wina qedêna: “Mehkema prohlemin a. Mehkema mecbura ke komelî roşna bikera. Tehqîqat nêame hîrakerdiş û komelê Tirkîya hîkayeya Qetlîyamê Garê Anqara baş nêzano. Mehkema dosya tena hêrişkarê ke merdî sera bena. Badê qetlîyamî mi keyeyê mexduran reyde pêvînayîş viraşt û talebê heme keyeyan oyo ke abîdeyêk bêro viraştiş û hîkayeya înan nêra vîrîkerdiş.” ANQARA

Albuma Nûçeyê