KIRMANCKÎ

Faşîzmê AKPyî yeno wedarnayîş

Dem : 03 Pûşper 2018 Yekşem

HDP Tekîrdagî de xeylê kesê sosyalîst, feminîst, astengdar, mexdurê derbe û KHKyan namzed nîşan da. Namzedê HDPyî vatî: “Ma do weçînayîşê 24ê hezîrane de faşîzmê AKPyî wedarnî. HDP omidê heme kesan o.”

Nufisê Tekîrdagî nizdîyê mîlyonek kesan o û xeylê kurdî koçê Tekîrdagî kerdî. Tegîrdagî de xeylê zîreto awî estî û labelê polîtîkayê şaşî vera yenî texrîbkerdiş. Eşteyê sanayî erzîyenî Çemê Ergene û lêşinîya hewa resaya merheleya pewr berzî. 200 ra zêde fabrîkayî benê sebebê lêşinîya hewa, tebîet û nêweşîya merdiman. Bajarê rind û weşik de her ke şono zîretê awî kêmî benî. Tekîrdagijî amadekarîya weçînayîşê 24ê Hezîrane kenî. Partîya Demokratîke ya Şaran (HDP) Tekîrdagî de xeylê kesê sosyalîst, feminîst, astengdar, karker, mexdûrê derbe û Qerarnameyê Hukmê Qanûnî (KHK) sey namzed nîşan da. Babete ser o namzedê HDPyî yê Tekîrdagî Feray Mertoglu, Huseyîn Erîş û Salîm Kaplanî qisey kerdî û çarçeweya weçînayîşî de zanayîşan pare kerdî.

Namzeda HDPyî ya Tekîrdagî Feray Mertogluye 1962î de qezaya Gimgimî ya Muşî de ameya dinya û bi nasnameyê xo yê femînîstî yena zanayîş. Mertogluye eynî wext de Hereketê Xelisîyayîşê Cinîyan yê Tirkîya de ca gêna. Mertogluye destpêkê qiseykerdişê xo de wina va: “Ez endama SYKPyî ya HDPyî ya. HDP bîyo omidê şaran. HDP wayîrê paradîgmaya cinî û azadî ya. Tekîrdagî de potansîyelêk zêde esto. Ma do rayanê xo bikerî 2 qat.”

Fabrîkayan de kede yena werdişe

Huseyîn Erîşî astengdar o û Tekîrdagî de namzedê HDPyî yo. Erîşî qiseykerdişê xo de HDPyî sey keyeyê xo da şinasnayîş û wina va: “HDP partîya bindest, zaf ziwan, bawerî û nasnameyan o. Keyeyê mi koçberê Selanîkî yo. Waya mi koçberê Buşgaristanî reyde zewicîya. Cinîya mi zî Sêwazî ra ya. Hetêkê ma zî reseno romanan. Yanî ma cografyayêka zaf rengî de pîlî bîyî. Ez 1980î ra nata xebata sendîka de ca gêna. Hayîya mi Tekîrdag û Trakyaye ra esta. Fabrîkayan de kedê merdiman yenî werdiş. Ma vengê Tekîrdagî yî.”

Do 24ê Hezîrane de cewab bidî

Namzedê HDPyî Salîm Kaplanî qiseykerdişê xo de wina va: “Ma Nisêbînî yê Mêrdînî ra koçê Tekîrdagî bîyî. Ez mamostayî ra ameya îxraçkerdiş. Badê şert û mercê cuye û neheqîyan, mi qerar da ke ez biba namzed. Cografyaya ma de xeylê cîyayê estî. Ganî na rastî bêra qebulkerdiş. HDP cewabê faşîzmî yo û heme cîyayêyan paweno. Ma kesê ke sey ma nêfikirîyenî reyde qisey kenî. Badê qiseykedişan fikrê înan bedilîyeno. Kurd û kurdistanî do 24ê Hezîrane de cewabê Nisêbîn, Gever, Şirnex, Sûr û Efrînî bidî. Ma do piştî bidî yewbînan û faşîzmê AKPyî wedarnî.” TEKIRDAG

Albuma Nûçeyê