KIRMANCKÎ

Ez wazena deynê xo bida

Dem : 14 Pûşper 2018 Pêncşem

Namzeda HDPyî ya Anqara Îpek Gure waya Berpirsîyarê Rayirê Şorişê Kurdistanî Orhan Keskînî ke tewrê lîderê PKKyî Zindanê Amedî de kewtî rojeyê mengî û cuya xo vînî kerdbî ya. Gure va: “Ma deyndarê kesê ke şorişî de cuya xo vînî kerdî yî. Cok ra ez HDPyî de ya”

Xebatê weçînayîşê 24ê Hezîrane dewam kenî û xeylê hetê cîya-cîyayan ra kesî seba serkewtişê HDPyî tewrê xebatan benî. Namzeda Partîya Demokratîke ya Şaran (HDP) ya Anqara Îpek Gure waya Berpirsîyarê Rayirê Şorişê Kurdistanî Orhan Keskînî ke tewrê lîderê PKKyî Zindanê Amedî de kewtî rojeyê mengî û cuya xo vînî kerdbî ya. Namzeda HDPyî Îpek Gure qala weçînayîşê 24ê Hezîrane kerd û dîyar kerde ke ê wazenî deynê xo yê cuye bidî.

Gure destpêkê qiseykerdişê xo de va ‘ma her serê sibayî buroya weçînayîşî de tewrê embazanê xo programê xo yê rojêk amade kenî’ û wina dewam kerde: “Ma şonê zîyaretê esnaf, bazar û keyeyan. Ma deyndarê kesê ke hereketê şorişî yê Tirkîya û Kurdistanî de cuyê xo vînî kerdî yî. cok ra ez HDPyî de ca gêna. Ez bi têkoşînê demokrasî û azadîya şaran wazena ke deynê xo bida. Vera şorişî de çîyê ke ez kena tu çîyêk nîyî. Ê bi gonîya xo kerra dayî kerra ser. Ez mecbura ke heta peynî bixebitîya. Çimkî birayê mi yê şorişger esto. Ganî ez layiqê birayê xo biba.”

Gure dewamê qiseykerdişê xo de qala averşîyayişê HDP û siyasetê Tirkîya kerde û wina va: “Zindanê Amedî de faşîzm rijîya û şorişgerî ser kewtî. No têkoşîn seba erjê merdimîye, waştişê rizgarîya şaran û vengê înan o. Şorişgerê zindanê Amedî bi têkoşînê xo ser kewtî. No qêrayişê Orhan û Cemalan o. Têkoşînê ewro dewamê têkoşînê nê şorişgeran o. Kobanê vera çeteyanê DAIŞî de qezenc kerd. No serkewtişî de para xoverdayîşê zindanê Amedî esto.”

Gure qiseykerdişê xo yê peyênan de zî bale ante îttifaqê AKP-MHPyî ser û wina va: “Polîtîkayê îttifaqê AKP-MHPyî dewamê faşîzmê Zindanê Amedî yo. Ganî kurd, tirk, Çerkez û heme cîyayêyî sey zindanê Amedî bêrî têhet. Zindanê Amedî de birayê mi ra wazenî ke fek rojeyê mergîra vera bido. Ê zî nameyê Mustafa Karasu dano û vano heta ke Karasu nêro ez fek rojeyê mergî ra vera nêdana. Qasê ke ez zana Karasu û birayê yewbînan nêvînenî. Beno ke xebere nêdabî Karasuyî zî. Badê 53 rojan pîyê mi Orhanî nêweşxane de vîneno. Nêweşxane nizdîyê Ofîsî bî û nêweşxaneyêko leşkerî bî. Orhan pîyê mi ra vano wayirê Cemalî bivejên. Dima ra pîyê mi şono Anqara û 3 rojî ra dima xebera birayê mi amey.” ANQARA

Albuma Nûçeyê