KIRMANCKÎ

Erdogan dîktatorî awan kerd

Dem : 09 Sermawez 2018 În

Tecrîdo ke Rayberê PKKyî Ocalanî ser de yeno bicaardiş, dewam keno. Parlamentera Swîsije Laurence Fehlmann Rîelle bale ante tecrîdî ser û va: “Berpirsîyarîya Konseya Ewropa û CPTyî esta. Ganî seba Ocalanî têgêrayîşêko mîyanneteweyî virazîyo.”

Nizdîyê 2 serrî yo ke Girawa Îmrali ra ti xebere nîna girewtiş û na rewşe ver etirîyayîşê şarî her ke şono giranêr beno. Bitaybetî çend serrê peyênan de tecrîd hîna zaf ameyo girankerdiş û huqûqê mîyanneteweyî her roje yeno pelçiqnayîş. Şarê kurd û dostê ci vera tecrîdî de bireaksîyon î. Parlamentera Partîya Sosyalîst ya Swîssî ya Meclîsê Neteweyîyî Laurence Fehlmann Rîelle derheqê îxlalkerdişê heqan, nizdbîyayîşê Ewropa û tecrîdê serê Ocalanî de qisey kerde. Rîelle sîyasetê Tirkîye nizdî ra teqîb kena û meseleyê kurdan ser o zî nizdî ra eleqedar bena. Rîelleya ke her game têkilîyanê mabênê Swîssî û Tirkîye krîtîk kena, heman wextî de konferans û panelanê ke tewrê ci bîya de bale ancena îxlalkerdişê heqan.

Rîelle qiseykerdişê xo de va: “Derheqê ameyoxê Tirkîye de fikarê ma roje bi roje benê zêdeyêr. Dimayo ke Erdoganî weçînitişan de qezenc kerd heme dormeyan ser o otorîte viraşte. Na otorîteya xo sere de hemverê muxalefetî de vera heme dormeyanê ke ê rê serre nênanê ro sey wesîteyêka zextî şuxulneno. Çi kesê ke vera Erdogan û rejimê ê de vindenê sey sucdarêko potansîyel yenê vînayene.e. Îxlalkerdişê heqan ê Erdoganî tenya bi Tirkîye bisînor nêyê. Polîtîkaya ê ya Sûrîye û nê wextanê peyênan de seba ke hîna zaf paştîdayîşê dormeyanê neteweperweran qezenc bikero hêrişê serê Efrînî ramojnenê ke ê îxlalkerdişê heqan de sînorî vîyarnayê.”

Seba menfîatanê xo bêvengî

Rîelleye ard ziwan ke badê ke Erdoganî weçînitişan de qezenc kerd Tirkîye de dîktatorî awan kerde û wina domnaye: “Seba ke hema zî meclîs û hukm raşte ra nêwedarîyayê ma halê nikayênî sey sîstemêkê tam dîktatoryalî name nêkerê zî bicaardişî ramojnenê ke sîstemê dîktatorîye serdest o. Eke ewro Erdogan ameyo na nuqta nê de berpirsîyarîyêka Ewropa ya pîle esta. Ewropa polîtîkayê hukmatê Erdoganî sey Îslamê moderatî û gamê modernî ercnayî û paştî daye ê. Nê heme bîyî sebeb ke Erdogan bi asanî sîstemê xo yê dîktatorî awan bikero. Welatê ke dîktatorîya Erdoganî rê paştî danê sereyê înan de Îngilîstan û Almanya yenê. Welatê Ewropa seba menfîatanê xo vera rejimê Erdoganî de bêveng manenê.”

Bêvengmendiş nêno famkerdene

Reîlle qiseykerdişê xo yê peyênan de bale ante rewşa Rayberê Şarê Kurd Abdullah Ocalanî ser û va: “Ez wazena nê vajî ke rewşa Ocalanî xeylî muhîm a. Bi hawayêkê eşkerayî heqê Ocalanî yenê îxlalkerdene. Ocalan halkerdişê meseleyê kurdan de aktorêko muhîm o. Netîce de kurdî Ocalanî sey rayber vînenê. Şexsîyetêk ke hende nuqteyêka muhîme de yo îxlalkerdişê heqanê ci nêno qebûlkerdene. Îxlalkerdişê heqanê Ocalanî de Konseya Ewropa, Parlamentoya Ewropa û CPT zî berpirsîyar ê. Bêvengmendişê nê sazîyan nêno famkerdene. Ganî ê na babete biyarê ziwan. Ganî seba ke baleantişê şertanê Ocalanî têgêrayîşêko mîyanneteweyî ke her dormeyî ra merdiman xo de hewêneno bêro awankerdene." CENEVRE

Albuma Nûçeyê