KIRMANCKÎ

Elewîyî do goş nêdî polîtîkayanê AKPyî

Dem : 28 Avrêl 2018 Duşem

AKPyî bildirgeya xo ya weçînayîşî de vatbî ke do statuya keyeyê cemî bişinasnî. Namzetê herêma 3. yê Partîya Demokratîke ya Şaran (HDP) yê Stenbolî Alî Kenanogluyî qala sondê AKPyî kerd û da zanayîş ke elewîyî do tu reye polîtîkayê weçînayîşî qebul nêkerî.

Kenanogluyî qiseykerdişê xo de qala polîtîkayanê weçînayîşî yê AKPyî kerd û wina va: “Elewîyî do goş nêdî polîtîkayanê weçînayîşî yê AKPyî, do biewnî pratîkan. Qerarê mehkemaya herêm û Mehkemaya Heqê Merdiman ya Ewropa (DMME) yê keyeyê cemî, hetê AKPyî ra nêameyî şinasnayîş. Îqtîdarîyê AKPyî elewîyan rê cuye kerd heram. Heme talebê elewîyan yenî redkerdiş û rastê muameleyanê xiraban yenî. Îqtîdar hewl dano ke keyeyanê cemî sey haletê weçînayîşî bixebitno. Şarê elewî nê polîtîkayan qebul nêkenî. Keyeyê cemî babetê weçînayîşî nîyî. Ganî keyeyê cemî bibî îbadetxane. No qerarê mehkema ra dîyar beno.”

Kenanogluyî qiseykerdişê xo yê verênan de qerarê mehkemaya herêm û DMMEye ke keyeyê cemî sey îbadetxane qebul kerdbî, ard vîrî û wina va: “Îqtîdar no qerarî bi ca nêard. Nika zî îdîa keno ke do statuya îbadetxaneye bido keyeyanê cemî. No sond seba xapênayîşî yo. Elewîyî bawerîya xo bi nê polîtîkayan nêanî û qebul nêkenî. AKPyî bi xebitnayîşî bawerî xo resnayo ewro. Hîs û bawerîya merdiman ameyî xebitnayîş.”

Kenanogluyî dewamê qiseykerdişê xo de va ‘seba ke îqtîdar xitimîyayo, muracatê elewîyan kenî’ û wina donma: “Elewî nînê xapênayîş. Elewîyî do tu reye polîtîkayê weçînayîşî qebul nêkerî û biewnî pratîkan. 16 serrê îqtîdarîyê AKPyî de tu talebê elewîyan nêameyo qebulkerdiş. Nê sondî seba weçînayîşî yenî dayîş û şar yeno xapênayîş. Ganî kesêk daxî bawerîya xo bi AKPyî nêaro û nê qiseykerdişan qebul nêkero.”

Ganî heme bawerîyî seyyewbînan bibî

Kenanogluyî qiseykerdişê xo yê peyênan de zî wina va: “HDP seba bicaardişê talebanê heme şaran xeylê hewl dano. Bawerîya heme kesan babetêka muhîm a. Ganî heme bawerîyî seyyewbînan bibî û cîyayê çin bî. Ganî azadîya bawerî biba û heme kesî bi hawayo azade bicuyî. Ez elewîyan temsîl kena û do meclisî de waştişê elewîyan bipawa. Tena partîya HDPyî berê xo elewîyan rê akena. Sewbîna tu partîyî ziwan û bawerîya elewîyan qebul nêkenî û elewîyan nêkenî mîyanê xo. Cok ra mi HDPyî de xo sey namzet da nîşandayîş. HDP partîya heme cîyayêyan a.” STENBOL

Albuma Nûçeyê