KIRMANCKÎ

Êdî rayan danî HDPyî

Dem : 13 Pûşper 2018 Çarşem

Hemwelatîyê dewa Çaylar û Tuzlu yê qezaya Gimgimî verê cu rayan dayêne CHPyî. Hemwelatîyê dewe dîyar kerdî ke seba ke Erdogan sernêkewo do weçînayîşê 24ê Hezîrane de raya xo bibî HDPyî, çimkî no weçînayîşî de do ameyoxê Tirkîya dîyar bibo

Hemwelatîyê dewa Çaylar û Tuzlu yê qezaya Gimgimî yê bajarê Muşî verê cu rayanê xo dayêne CHPyî. Hemwelatîyî dewe hetê xo bedilnayî û nika derbazê HDPyî bîyî û do 24ê Hezîne de rayan bidî HDPyî. Babete ser o dewijê bi nameyê Bulent Demîrtaşo ke dewa Çaylarî de citkarî keno, Mehmet Bozkiro ke 45 serrî yo Ewropa de cuyeno û demserrê hamnanî de yeno welat, Mehmet Sezenc, Vezîre Saglama ke dewa Tuzluye ra ya û Gulîzar Balliya ke eynî dewe de cuyena qisey kerdî û bale antî muhîmîya weçînayîşê 24ê Hezîrane ser.

Demîrtaşî destpêkê qiseykerdişê xo de wina va: “Ez do 24ê Hezîrane de raya xo bida HDPyî. Ma do 24ê Hezîrane de dîktatorî çin bikerî. Erdogan hetgiranê xo tena miqate keno. Kesê dewlemend hîna dewlemend benî û kesê feqîrî zî hîna feqîr benî. Qiseykerdişan de xeylê sozan danî, labelê pratîkî de çîyêk daxî nêkenî. Eke Erdogan ser bikewo do tena kurd nê elewî zî nêmanî. Do qirê merdiman bîyaro. Cok ra ez raya xo dana demokrasî û HDPyî.”

Ma weçînayîşî de yenê vîrê Erdogan

Bozkirî qiseykerdişê xo de dîyar kerd ke do weçînayîşê serekkomarî de raya xo bido Muharrem Înce û yê parlementerî de zî raya xo bido HDPyî û wina va: “No weçînayîr, weçînayîşê verê cu ra zaf muhîm o. Çimkî do ameyoxê Tirkîya dîyar bibo. Elewî tena wextê weçînayîşî de yenê vîrê Erdogan û AKPyî. Seba ke HDP barajî derbaz bikero, ma do rayan bidî HDPyî.” Sezencî zî qiseykerdişê xo de dîyar kerd ke ê CHPyî yo û do weçînayîşê pêroyî de raya xo bido HDPyî, çimkî wazeno ke HDP barajî derbaz bikero.

Omidê ma 24ê Hezîrane yo

Saglam û Balliye ke eynî dewe de yî qiseykerdişê xo de wina vatî: “Ma nêwazenî êdî Erdogan û AKP bibî îqtîdar. Ma aştîye wazenî. Seba rojê weşe ma Xizirî re dua kenî. elewî wazesî goreyê elewîtî bicuyî. Tena prosesê weçînayîşî elewî yenê vîrê înan. Ma zî CHPyî ra yî û ma do raya xo bidî HDPyî. Ma omid kenî ke 25ê Hezîrane de Tirkîyaya weşik bêra awankerdiş.” MUŞ

Albuma Nûçeyê