KIRMANCKÎ

Dewa Leylaye de bevengî esta, domanî kay nêkenî

Dem : 11 Tîrmeh 2018 Çarşem

Dewa Bezirganî yê Agirî de roja yewin yê rojanî de Leyla Aydemîra 4 serrî vînî bîbî û badê 18 rojan cenazeya aye ameybî dîyiş. Nika dewa Leylaye de bevengî esta û dewa 15 keyeyan de domanêk daxî teber de nîno dîyiş. Ber û şibakê heme keyeyan padayeyî. Tena camîyo ke şînê Leylaye tede ame ronayîş de wesayîtî estî, la kesêk daxî qisey nêkeno û dîyar kenî ke pêroyê zanayîşan destê emnîyetî de yî. Dewijo 20 serrî ke nêwaşt nameyê xo bido dîyar kerd ke mumkun nîyo ke qatilê Leylaye teberê dewe re bibo. Dewijê ke qisey kerdî dayî zanayîş ke daliqnayîş çareserî nîyo û wexto ke daliqnayîş bibo serede do kurdan bidaliqnî. Babaete ser o pîyê Leylaye Nîhat Aydemîrî qisey kerd.

Nîhat Aydemîrî qiseykerdişê xo de wina va: “Badê 18 rojan cenazeya kênaya mi eştî mîyanê awe. Qatil hema zî nêameyo dîyiş. Beno ke no kes mîyanê ma de bibo. No kes cenaze ard û şî. Ez omid kena ke kênaya mi domana pêyên biba. Kesê ke seba vînayîşê Leylaye xebitiyayî kedêk pîl dayî. Ez veng dana heme kesan ke heta dîyişê qatilî wa domanê xo bipawî. Çimkî qatil hema mîyanê ma de yo. Homa ra nêtersenî.”

Aydemîrî qiseykerdişê xo yê peyênan de waşt ke qatilê Leylaye bêro dîyiş û wina va: “Heta ke qatil nêro dîyiş asayî nêbeno. Gani qatil rojê ver bêro muhakemekerdiş. Ma dewlete ra dîyişê qatilî wazenî. Kesê ke bi çimanê xo hedîse nêdîyî îfadeyê zurî danî. Ma do nê kesan gere bikerî.” AGIRÎ

Albuma Nûçeyê