KIRMANCKÎ

Dersimî: Ewilî mîtîng dima ra sindoq

Dem : 21 Pûşper 2018 Pêncşem

Partîya Demokratîke ya Şaran (HDP) 22ê Hezîrane bajarê Dêrsimî de Qada Seyîd Riza saet 15.00î de do mîtîngêk biviraza. Hemserekê Pêroyî yê HDPyî Sezaî Temellî do tewrê mîtîngî bibo. Dêrsimijî dîyar kerdî ke ê do bi coşêk gird tewrê mîtîngî bibî.

Babete ser o hemwelatîyê binameyê Şivan Cengîz Basrîona ke do dewe ra şêra mîtîngî, Beycan Saglam, Riza Ekînciyo 90 serrî, Elîf Akgul, Huriye Aydigan û wendekar Serhat Aydinî qisey kerdî.

Hemwelatîyî qiseykerdişê xo de wina vatî: “Vera heme pelçiknayîşan de, ma do tewrê mîtîngî bibî û HDP do nîşan bido ke senî qade bi merdiman debenî. Ganî heme dewijî qada Seyîd Rizayî de bibî. Wa heme dewijî bi reng û vengê xo bêrî qada mîtîngî. Partîya ke wayîrê dewijan vejîyena HDP ya. Seba ameyoxê komelî, ganî ma wayirê HDPyî bivejîyî. Kesê ke doza aştî û yewî kenî, ganî beşdarê mîtîngî bibî. Ganî heme kesî rayan bidî HDPyî.”

Hemwelatîyî qiseykerdişê xo yê peyênan de wina vatî: “Ganî qada mîtîngî pirr biba. Tena HDP eşkeno AKPyî têk bibo. Eke HDP barajî derbaz nêkero do heme rayî şêrî AKPyî. Lazimîya ma bi HDPyî esta. Kesê ke verê cu rayan dayêne CHPyî zî dîyar kenî ke do weçînayîşê 24ê Hezîrane de rayan bidî HDPyî. Ma do roja Îne bi coşêk gird Qada Seyîd Rizayî de bibî. No weçînayîş weçînayîşêko krîtî o. Ganî hayîya  heme kesan krîtîkbîyayîşê rewşe ra biba. Eke ma demokrasî biwazî, ganî ma berpirsîyarîya xo bîyarî ca. Coşê mîtîngî do sindoqan de xo bido teber."DÊRSIM

Albuma Nûçeyê