KIRMANCKÎ

Dagirkerî

Dem : 29 Avrêl 2018 Sêşem

Rojeva kurdan de dagîrkerîya dewleta tirke esta. Dagîrkerî çik a? Dagîrkerî a ya ke yew dewlete şina welat yan zî dewletêka bîne kena bin bandura xo. Uca de kolonî yan zî îqtîdarê xo ronana. Dagîrkerîye bi kilmî wina ya. Labelê dagîrkerîya ke Kurdîstan de yena ramitene, wina nîya. Bi taybet zî dagîrkerîya dewleta tirke. Çi rê?

Kurdî bi seyan serran o nêbîyê wayîrê sîstem û dewlete. Her tim dagîrkerîye reyde rî bi rî mendê. Fars, ereb û tirkan her tim welatê kurdan dagîr kerdo. Na dagîrkerîye hîna zî dewam kena. Dinyaya bêbexte zî nêkewena derdê kurdan ver û rasterast bo nerasterast bo piştî dana dagîrkerîye.

Peynîya nê sîyaset û kerdenan de mezgê kurdan ameyo dagîr kerdene. Nika problemo tewr gird dagîrkerîya ke mezg de ameya kerdene ya. Heta ke na dagîrkerîye nêro vîyartene, dagîrkerîya ke ser erdê kurdan de bena, peynî nêbena. Qandê cû ganî kurdî yê ke aya nêbîyê û mezgê xo de peynî bi dagîrkerîye nêardo, xo bihesê û peynîya na dagîrkerîya kambaxe bîyarê. Eke wina bî, Kurdîstanî ra qewirnayîşê dişmenî asan beno.

Dagîrkerîya bîne zî ser hîs û hestanê kurdî de ameya kerdene. Hem gerîlatîye mîyan de hem zî çar leteyanê Kurdîstanî de, şarî mîyan de mi dîyo ke hetê hîs û hestan ra kurdî nîme ra vêşî bi hîs û hestanê dagîrkeran cuyenê. Bi no hewa hîs û hestê kurdî ver bi çinbîyayîşî şinê. No problem gird û girîng o la kes ferqê ci de nîyo. Êyê ke ferqê ci de yê, kenê qîr û hawar la kes vengê nînan nêheseno. No zî yew problemo gird o. Eke nêro vîyartene, dagîrkerîye ser kewena. Ma Kurdîstan awan bikerê zî hîs û hestê kurdî nêmanenê. Şexsîyeto ke bêro raste zî do çewt û tewş bo û eleqeyê xo cewhera kurdî ra nêbo.

Dagîrkerîyêka bîne zî hetê ziwan ra yo. Heme hetê Kurdîstanî de hol yeno vînayene ke ziwanê ma ver bi çinbîyayîşî şino. Beno ke tayê kesî vanê kurmancî xo reynaya la ez a bawerîye de nîya. Beno ke tayê cayan de perwerdeyê kurmancî yeno dayene. Hetê medya ra xebate û dezgehî estê. La êyê ke zanenê, kenê hawar û vanê hişê kurdî ameyo bombevaran kerdene. Yanî ziwan û nuşte kurdî yo la hiş tirk, fars û ereb o. No zî yew problemo gird û sera neway û pancê kurdan na rastîye ra xeberdar nîyê.

Ma bêrê dagîrkerîya ke erdê ma ser o esta, ser. Vakurê Kurdîstanî de çewres serrî yo têkoşîn yeno dayene la hewtay hezar qoricîyî zî estê. Kurdê ke kurdî nêzanê û welatperwer nîyê bi mîlyonan ê. No problem gird o û xeylê kesî na rastîye ra xeberdar nîyê. Qandê cû dewleta tirk hende xo ra bawer a. Bi israr vera gerîlayan de şer kena. Bê hed û bê hesab kurdan kişena û heqaret kena.

Başûrê Kurdîstanî seba şarê kurdî bîyo sey kulo sîya. Herinda ke piştî bido şorişê Vakur û Rojawanî, dagîrkeran ra vêşî dişmenî kena û nêverdana Rojhelatê Kurdîstanî de zî têkoşîn bêro dayene. Rojawanê Kurdîstanî de wexto ke Efrîn ame dagîrkerdene, heme kurdan şok ravêrna la ganî ma bizanî Kurdîstan yew o û eke heme kurdî heme letan de bibê yew, şenê dagîrkerîya sey Kerkûk û Efrînî ser o ame kerdene de bibê asteng.

Albuma Nûçeyê