KIRMANCKÎ

Çare - Nûşteyê Azad Ararat

Dem : 12 Pûşper 2018 Sêşem

Azad Ararat

Vakurê Kurdîstanî û Tirkîya de atmosferê weçînayîşî bîyo germ. Bêgûman seba kurdan serkewtişê kurdan girîng o. Nêke mabeynê AKP û CHP de ferq çin o. La seba ke AKP û ekîbê Erdoganî zaf heddê xo ravêrna, ma wazenî sernêkewo.

Nika ma mecbur mendê biwazî di dişmenan ra yew hîna vêşî serbikewo. Na zî psîkolojîyê bindestîye ra yena. Wexto ke merdim xo çare nêvîno xora wina beno. Verê verkan ez naye vajî: weçînayîşê Tirkîya seba ma kurdan, kam ser keweno wa bikewo, çareserî xo reyde nêano. No het ra ma biewnî; weçînayîş û şîyayîşê meclîsî beno yew metodo legal yê têkoşînî. Naye ra vêşî teba raste de çin o. Yanî eke HDP şiro meclîs, problemê ma kurdan çareser nêbenê. Eke HDP nêşiro meclîs fina paynîya dinya nêyena. Yew weçînayîş yeno kerdene û dewleta dagîrkere do îqtîdarê xo newe bikero. Çi îslamîst çi zî netewperest kam ser bikewo, ma rê ferq nêkeno. Wa badê kes şaş mebo eke CHP serkewt beno ke AKP ra vêşî şerê kurdan bikero û rayîro ke Erdoganî akerdo ser o hîna şahînane vera Tevgerê Azadîye de şer bikero.

Seba ma kurdan, seba şaranê Rojhelatê Mîyanênî, seba merdimîye; serkewtişê gerîlayan girîng o. Eke gerîla serkewt û sîstemê konfederalî raver berd, o wext manaya nê weçînayîşan û propagandayê weçînayîşan nêmaneno. Seke Rojawanê Kurdîstanî de yeno dîyene, eke şarê ma bêrê têhet û sîstemê xo ronê hewcedarî nê partîyanê qilêrinan ra nêmanena.

Hetêk ra propagandaya HDP û Selahattîn Demîrtaşî yena kerdene. Seba ke ma prosesê weçînayîşî de yê no normal o, la ganî ma seba Rayberîye hîna vêşî têkoşîn bidî. Gerîlayê ke her roje xover danê, ganî nêrê vîra kerdene û esas têkoşîn yê gerîlayan o. Eke ê nêbê ne HDP ne zî Selahattîn Demîrtaş nêbeno. No het ra yew kemaneyî esta. Nê çend mengî yo Başûrê Kurdîstanî game bi game yeno dagîr kerdene. Tîya de nîyetê dewleta tirk yeno zanayene. A wazena heta Kerkûk û Mûsilî Kurdîstanî dagîr bikera. Naye yena fam kerdene. O yo ke nêyeno fam kerdene, îxanetê keyeyê Barzanîyî, îxanetê pêşmergeyan û yê qoricîyê Vakurê Kurdîstanî yo. Mi gore medyaya ma nê hîrê îxanetkaran ser o zaf nêvindena. Tay roportajî û nuşteyî hetê Tevgerê Azadîye ra ameyî vila kerdene, her kesî zî wend la no het ra ayabîyayîş tay o. Dagîrkerîya ke yena kerdene tarîxî ya û serranê verê ma de do vernîya şerêkê xorîn û hera akero. Beno ke Rojawan û Başûrê Kurdîstanî de yanî Efrîn ra heta Kerkûk şer bêro raste. Ganî ma yê kurdî û dostanê ma xo naye ra hazir bikerê.

Heto bîn ra heta rewşa Tirkîya ya stratejîke wina bo, zehmet o bi metodanê demokratîkan promlemê kurdî çareser bibo. Çunke Tirkîya hem hetê sîyasî ra xo roşena NATO û ABD, hem zî xo roşena Rûsya. Nê her di hetî zî wazenê Tirkîya biancê xo het. Fina feydeyê nê her di hetan Tirkîya de esta. Coka rew bi rew fek Tirkîya ra veranêdanê. Tirkîya zî sey fahîşeya sîyasî xo vejena bazar û roşena. Qandê cû vernîya ma de bi weçînayîşî ney bi têkoşînêko pêt dest girewtişê heqanê xo esto. No zî bi şerê şarê ma û yê gerîlayan a beno.

Albuma Nûçeyê