KIRMANCKÎ

Aqubetê Gulenî do bêro serê Erdoganî

Dem : 11 Pûşper 2018 Duşem

Muftiyê Amedî yê kehen û Namzedê HDPyî yê Riha Nîmettullah            Erdogmuşî bale ant aqubetê Serekomar Erdoganî ke xo sey ‘omidê peyên yê ummetî’ dano binamekerdiş ser wina va: “Ma aqubetê Gulenî dî. Aqubetê Gulenî do bêro serê înan zî”

Namzed û xebatkarê Partîya Demokratîke ya Şaran (HDP) bajar bi bajar, dewe bi dewe û ber bi ber gêrenî şarî ra destek wazenî. Parlementerê HDPyî yê Amedî, Namzedê HDPyî yê Riha û Muftiyê Amedî yê kehen Nîmetullah Erdogmuşî qala rewşa Erdogan û zextê ci yê cemaatan ser kerd.

Erdogmuşî destpêkê qiseykerdişê xo de qala tarîqat, cemaat û cemîyetan kerd û wina va: “Eke nê komeleyê ke ameyî awankerdiş rol û wezîfeyê xo bîarî ca do aştî pê bêro û heme problemî do bihawayo baş çareser bibî. Labelê eke nê komeleyî sey îqtîdarî hereket bikerî do letebîyayîşêk bivirazîyo. Do komelî bikerî kole û îtaatê xo bikerî. Xeylê pêxember û kîtabê bimbarekî ameyî. Heme kîtaban de zî eynî çîyî yenî vatiş ke xizmetê aştîya komelî bikerî. Îqtîdar wazeno ke nê heme komeleyan bikero bin destê xo û emrê xo derg bikero.”

 Erdogmuşî qiseykerdişê xo de da zanayîş ke ewro heme cemaat û tarîkatî xizmetê îqtîdarî de yî û wina va: “Îqtîdar xitimîya yo û krîz cuyeno. Îzehetê tarîkat, cemaat û komeleyan yê înan bi xo nîyî. Îzehet hetê îqtîdar û hemkarê înan ra yenî amadekerdiş û sey fikrê înan yenî nîşandayîş. Eke wina dewam bikero do bawerîya komelî vînî biba. Cemaatê Fethullah Gulenî zî sey înan o. Deshezaran kesî bîyî mexdurê cemaatî. Eke wina dewam bikero do aqubetê Gulenî bêro serê Erdoganî.”

Goreyê qanûn no suc o

Erdogmuşî qiseykerdişê xo yê peyênan de bale ant qiseykerdişê Erdoganî yê mîtîngê Amedî ser û zî wina va: “Erdogan mîtîngê Amedî de veng da meleyan û va ‘Nimajî sewbîna kesan rê vera bidên. 5 kesan bidêne kişta xo û tewrê mîtîngî bibên.’ Miftîyê Yenişehirî (Şefket Dilmaç) bi rayirê SMSyî mesaj erşawit heme meleyan. Seba ke bikewo çimê îqtîdarî wina keno. Heme camîyan de sureya fetîhî amey wendiş. Goreyê qanûn no suc o.” RIHA

Albuma Nûçeyê