KIRMANCKÎ

AKP qezencanê cinîyan qesp keno

Dem : 07 Pûşper 2018 Pêncşem

Sere de Vakurê Kurdistanî û Tirkîya de û teberê welatî de bi coşêko gird xebatê weçînayîşî dewam kenî. Nê cayan ra yew zî bajarê Agirî yo. Weçînayîşê kehen de Partîya Demokratîke ya Şaran (HDP) bajarê Agirî ra 3 parlementeran vetbî û nika zî hewl dano ke 4 parlementeran ewja ra bivejno û seba temsîlkarîya şarê bindestan înan bierşawo meclisî. Nê namzedan ra yewe zî Kezban Dumluye ya.

Kezîban Dumluye namzeda rêza 4. ya HDPyî ya û Bazidî de ameya dinya. Hîrê domanê aye estê û 2008î ra heta nika xebatê partî de ya. Dumluye Bursa de Partîya Herêmê Demokratîkî (DBP) de ca girewta û prosesê HDPyî de zî hemserekî kerda. Badê weçînayîşê 1ê Teşrîna Peyêne zî Amedî de xebatan meşnaya. Dumluye Amedî de ameye tewqîfkerdiş û dima ra serbest ameye veradayîş. Nika zî mîyanê namzedanê Agirî de ca gêna.

Dumluye qiseykerdişê xo de daye zanayîş ke Tirkîya de partîya tewr demokratîke HDP yo û wina va: “HDP temsîlkarê heme şaran o. Agirî wayîrê taybetîyêko feodal o. Şiknayîşê nê prosesî zehmet o. Labelê têkoşînê azadîya cinîyan mintiqaya Serhedî de feodalîzmî bedilna. Weçînayîşî de rolê cinîyan muhîm o. Cinîyî 24ê Hezîrane de do cewab bidî AKPyî.” AGIRÎ

Albuma Nûçeyê