KIRMANCKÎ

Adirê ma nêşino hewn a!

Dem : 28 Avrêl 2018 Duşem

Serhildan ANDAN

Merheba embazîno… Rîpelêko newe de, rojêka nîme-azade de ma hêna pîya yê. Tayînan vatêne qey vengê ma binî ra birîyeno û ma hînî nêeşkenî raştîyan biresnî şarî. Ê tayînanê ke wina fikiryayêne hêna kewtî mîyanê şaşîyan û sey her wext mîyanê gola xo ya gemarine de yan zî mîyanê awa lêle de xerq bîyî. La cayê xo de nêvindenî û wazenî hêna newe ra astengîyan virazî û vera heqdarîya ma de hêna newe ra xerq bibî.

Çapemenîya azade desan serrî yo ke ha pay ser de û bi sereberzîya xo vera heme astengîyan de weşananê xo yê ke tu wext raştîyan rê tawiz nêdanî, domnena. Bê ê kesî ke raştîyan rê hes nêkenî kesê bînî heme na rewşe ra eciz î û kenî ke her wext bi kerdenanê cîyayan vernîya weşananê azadan bigîrî. En peynî Welat û Ozgurlukçu Demokrasî raştê hêrişê înan ê teberê hiqûqî de ameyî. Her di rojnameyî zî esasê tawiznêdayîşê raştîyan ser o, xîzê çapemenîya azade de weşananê xo kerdêne. Labelê çapbîyayîşê nê her di rojnameyanê rojaneyan weşê dişmenê kurdan nêşiyêne. Ê bi kerdenanê xo waştêne şarê kurd û dostanê ey bitersnî; la nê her di rojnameyî tersa ke ê waştêne welat de bikerî serwer kerdêne vila û şarî rê bîyêne roşnîya rojan… Ê waştêne asîmîlasyon dewam biko; la nê her di rojnameyî polîtîkaya înan a înkarkerî rê her roje derbeyêka bîne dayêne piro… Ê waştêne qetlîamanê xo binimnî; la nê her di rojnameyê ke raştîyan ser o xo dabî qebûlkerdiş, qetlîamanê înan raya pêroyî ya dinya rê pare kerdêne… Ê waştî Kerkûk û Efrîn mezgê şarê kurdî rê bivejî; la nê her di rojnameyî seba Kerkûk, Efrîn û heme Kurdistanî mezgê şarê kurd her wextan rê hêna zêde kerdî zelal…

Ewro zî aqilê înan eynî tewir xebetîno. Kenê ke kerdenanê xo yê lêşinan, şaran rê bitaybetî zî şarê kurdî rê binimnî, la baş zanî ke hînî cayo ke bieşkî nimitik têwbigêrî nêmendo û çapemenîya azade her tewir lêşinîya înan yew bi yew vejena orte. Waştişê şarê kurd ê se serran her wextan ra hêna zêde raya pêroyî ya dinya rê pare kena û kena ke welat de çi qewimîyeno hêna leze biresno şarê xo… Rayîrê resnayîşê raştîyan goreyê demî bedelîno û aye ra çapemenîya azade her wext xo kena newe. Demo nikayîn de rayîrê resnayîşî zêdeyîr televizyon û înternet ser o yî. Xura televîzyonê ke welatî ra weşan kerdêne zî bi eynî sebeban raştê hêrişan amebî û padîyabî. La înternet hêna azad o û çapemenîya azade kena ke na qada azade de raştîyan biresna şarî. Aye ra e-rojname goreyê demî gamêka pîle û muhîm o.

Kurdî hînî rojnameyê xo yê kurdkî înternetî ser o wanenî û resenî xeberanê raştan. Înternet hêna azad o û na azadîye seba vilabîyayîşê kurdkî firsendêk o. E-rojname, hetêk de zî mîraso ke Azadîya Welatî rê girewto qada xo ya newe de domneno. Raşta ci wextêko winasî de estbîyayîşê rojnameyêko kurdkî yo rojane zaf muhîm o; hem ciwanê kurdan ê ke nika înternetî de wextê xo zêdna vîyarnenî hem zî seba şaran no kar, karêko biqîmet û pîroz o. Ê se bikerî zî adirê çapemenîya azade nêşino hewn a û raştîyan rê tu wext tawiz nêno dayîş.

Albuma Nûçeyê